Міністэрства культуры Рэспублікі Беларусь

Святочны канцэрт, прымеркаваны да кітайскага Новага года - свята Вясны - адбыўся 13 лютага ў Рэспубліканскім Палацы культуры прафсаюзаў. Мерапрыемства называлася "Жыватворны конь прыносіць шчасце. Канцэрт "Вясёлае свята вясны".

Перад пачаткам канцэртнага выступлення працавалі інтэрактыўныя зоны з дэманстрацыяй нацыянальнай культурнай спадчыны, арганізаваныя дэлегацыяй з Пекіна. Госці мерапрыемства змаглі пазнаёміцца з маляваннем карамеллю, размалёўваннем масак пекінскай оперы і клуазонне (мастацкія вырабы з эмаллю). Акрамя таго, былі арганізаваны выстава макетаў дызайнаў, прысвечаных Году каня і інтэрактыўныя майстар-класы пры ўдзеле інстытутаў Канфуцыя БНТУ і БДУФК.

Арганізатарамі мерапрыемства сталі Міністэрства культуры Беларусі, Міністэрства культуры і турызму КНР, Мінскі гарадскі выканаўчы камітэт і пасольства КНР у Беларусі. Выканаўцы - упраўленне культуры і турызму Пекіна, Кітайскі культурны цэнтр у Мінску.

На канцэрце выступалі артысты з танцавальнага ансамбля "Хэюнь" Пекінскай акадэміі танца з традыцыйнымі кітайскімі танцамі, аркестр "Цiнлань", сфармаваны з лепшых музыкаў Кітая, цыркавая арт-група "Шаохуа", якая складаецца з выбітных артыстаў кітайскага цырка, калектыў баявых мастацтваў "Лунъюнь" каманды Чэн Цзябань школы Джэкі Чана. Праграма была вельмі разнастайнай - танцы, інструментальная музыка, акрабатыка і баявыя мастацтвы, якія адлюстроўваюць традыцыйную культуру Кітая і яе сучасную дынаміку.

Перад пачаткам канцэрта з прывітальнымі словамі да прысутных звярнуліся Надзвычайны і Паўнамоцны Пасол Кітайскай Народнай Рэспублікі ў Рэспубліцы Беларусь Чжан Вэньчуань і Міністр культуры Рэспублікі Беларусь Руслан Чарнецкі.

Беларусь высока цэніць шматгадовае стратэгічнае партнёрства з Кітаем. Такі пункт гледжання выказаў Міністр у сваім прывітальным слове. Міністр адзначыў, што сённяшняе мерапрыемства з'яўляецца наглядным пацвярджэннем трываласці культурных мастоў, якія злучаюць Беларусь і Кітай. Ён падкрэсліў, што Рэспубліка Беларусь высока цэніць шматгадовае стратэгічнае партнёрства з Кітайскай Народнай Рэспублікай, заснаванае на прынцыпах узаемнай павагі, раўнапраўя і ўліку ўзаемных інтарэсаў.

"Варта адзначыць, што наша ўзаемавыгаднае супрацоўніцтва ў першую чаргу будуецца на даверы і дружбе паміж лідарамі нашых краін - Прэзідэнтам Рэспублікі Беларусь Аляксандрам Лукашэнкам і старшынёй Кітайскай Народнай Рэспублікі Сі Цзіньпінам. Нашы краіны выбудавалі трывалую архітэктуру ўзаемадзеяння, якая ахоплівае плённае супрацоўніцтва па ўсіх ключавых напрамках", - сказаў кіраўнік ведамства.

Руслан Чарнецкі звярнуў увагу на дынамічна развіваемыя адносіны ў сферы культуры.

"На сённяшні дзень паміж нашымі дзяржавамі сфарміравана трывалая і шматузроўневая аснова для ўсебаковага культурнага супрацоўніцтва. Мы маем поўны комплекс неабходных умоў - ад нарматыўна-прававой базы, замацаванай у міжурадавых і міжведамасных пагадненнях, да развітой сеткі нефармальных кантактаў, дружалюбных і асабістых сувязяў. Усё гэта стварае ўнікальныя перадумовы для далейшага паглыблення культурнага дыялогу і ўмацавання ўзаемаразумення паміж нашымі народамі", - лічыць Міністр.

"Нашы творчыя калектывы актыўна і на пастаяннай аснове гастралююць па Кітаі. Напрыклад, толькі летась Вялікі тэатр оперы і балета з вялікім поспехам даў канцэрты ў дванаццаці кітайскіх гарадах, а Рэспубліканскі тэатр беларускай драматургіі ажыццявіў сем паказаў спектакляў у Шанхаі", - дадаў ён.

Руслан Чарнецкі таксама расказаў, што ў музеях Беларусі і Кітая праходзяць знакавыя выставы, якія падкрэсліваюць моцную культурную сувязь паміж нашымі народамі. Да прыкладу, у Шанхаі дэманстравалася экспазіцыя "Крывею сэрца" пра беларускіх пісьменнікаў-франтавікоў, а ў Мінску ў Нацыянальным гістарычным музеі экспанавалася ўнікальная выстава "Нітка лёсу. Беларусь-Кітай", дзе ўпершыню былі прадстаўлены паштоўкі і фатаграфіі з відамі Паўночнага Кітая з асабістых калекцый, а таксама падарункі кітайскіх дэлегацый, комплекс прадметаў нумізматыкі і баністыкі з фондаў Нацыянальнага гістарычнага музея Рэспублікі Беларусь.

На думку Міністра, асаблівай увагі заслугоўвае развіццё кінематаграфічнага дыялогу паміж Беларуссю і Кітайскай Народнай Рэспублікай.

"Кітайскія майстры экраннага мастацтва даўно і трывала занялі годнае месца ў праграме Мінскага міжнароднага кінафестывалю "Лістапад". Асаблівай вяхой стаў другі па ліку дзень кітайскага кіно, праведзены ў рамках фестывалю. Гэта падзея, безумоўна, набывае статус добрай традыцыі, узбагачаючы фестывальную палітру сапраўднымі шэдэўрамі кітайскай кінематаграфіі і ўмацоўваючы культурныя масты паміж нашымі краінамі. Беларускае кіно ўпэўнена заваёўвае прызнанне ў Кітаі. Яркае таму пацвярджэнне - поспех карціны "Чорны замак" Нацыянальнай кінастудыі "Беларусьфільм", удастоенай прэстыжнай узнагароды за лепшую работу мастака-пастаноўшчыка на кінафестывалі краін Шанхайскай арганізацыі супрацоўніцтва ў Чунцыне", - канстатаваў кіраўнік ведамства.

Акрамя таго, ён звярнуў увагу, што ў беларускіх установах сферы культуры вучыцца амаль тысяча кітайскіх студэнтаў.

"Рэалізуюцца розныя адукацыйныя праграмы з кітайскімі партнёрамі, арганізаваны летнія школы для знаёмства з беларускай культурай. Кожны студэнт, кожны сумесны праект, кожная культурная сустрэча закладваюць падмурак для шматгадовага партнёрства, заснаванага на ўзаемнай павазе і шчырым інтарэсе да духоўных каштоўнасцей адзін аднаго", - рэзюмаваў Міністр культуры Беларусі.